抱住我係嚟睇一出青春校園破鏡重圓愛情劇點解會攞金像獎嘅心情，結果就係完全出乎我意料嘅好睇，幾乎喊咗大半套戲，平複完心情出影院攞poster工作人員：我就話明明仲有一個。
劇情平穩而不拖沓，有反轉位有驚喜位，每一處配樂都恰到好處、好聽。當我睇到Summer望住蘇升華彈琴個背影，嗰種好心up嘅感覺令我忽然反應過嚟，唔通今鋪又玩940920？果然…不得不說許恩怡每一場喊戲，我都睇到忍唔住跟著喊。
仲有一個位係我而家腦内重溫返醒起嘅，就係佢哋蕩千秋，蘇突然叫“夏文萱”，有閃過一瞬間嘅驚喜，“有冇人話你好似你阿媽”，跟返後面夏文萱好失望質問蘇係唔係唔記得咗佢，再回想返千秋嗰一個眼神其實都同樣帶著失落。
喺睇戲前一日我有開始聽《久别重逢》，好驚喜原來係鄭伊健Ian合唱，睇戲中間嗰陣就會忍唔住開始谂：欸？所以佢哋會一齊唱呢首歌嘅機緣係乜嘢？答案點知又真係有。原來都係一出講夢想講初心嘅戲。
距離睇完電影過去一個鐘，依然喺巴士上喊到眼淚止唔住，可能係耳機裡播住《久别重逢》太好聽，可能係睇咗一套好睇嘅電影太難得，可能係谂返起伊面呢個中佬真係好靓仔，就係好想喊…
希望有更多嘅人可以睇到《久别·重逢》。
